«Ապրելու երկիր» կուսակցության նախագահ Մանե Թանդիլյանը շնորհավորական ուղերձ է հղել Մարտի 8-ի առթիվ․
«Սիրելի՛ մայրեր, քույրեր և դուստրեր,
Շնորհավորում եմ բոլորիդ Մարտի 8-ի առթիվ:
Ինձ համար՝ որպես կին և որպես քաղաքական գործիչ, այս տոնը սոսկ օրացուցային չէ: Սա առիթ է՝ գնահատելու այն հսկայական ճանապարհը, որն անցել են կանայք՝ վերաիմաստավորելով իրենց դերը կյանքի բոլոր ոլորտներում։
Վաղուց արդեն կոտրվել է «թույլ էակի» կարծրատիպը։ Ժամանակը ցույց է տվել, որ կնոջ իրական ուժը հենց հակադրությունների ներդաշնակության մեջ է. մենք կարող ենք լինել հոգատար, բայց վճռական, իմաստուն, բայց համարձակ։ Կինն այսօր ոչ միայն պահպանում է ընտանիքի անդորրը, այլև կառուցում է զարգացման նոր օրակարգեր՝ իր շուրջը տարածելով վստահություն և հույս։
Եվ յուրաքանչյուր աղջիկ պետք է մեծանա վստահությամբ, որ կարող է առաջնորդել, որոշումներ կայացնել և պատասխանատվություն վերցնել երկրի ապագայի, իր մեծ ու փոքր միջավայրի համար։
Մեծ ակնածանքով և խոնարհումով հիշում եմ այն բոլոր մայրերին, կանանց ու աղջիկներին, ովքեր պատերազմներում կորցրել են իրենց զավակներին, հայրերին, եղբայրներին կամ սիրելիներին։ Ձեր ուժը, տոկունությունը և անկոտրում կամքը մեր բոլորի ոգևորությունն են, ձեր օրինակը՝ մեր ուղեցույցը։
Սիրելի կանայք, թող մեր հավատն ու ամենօրյա աշխատանքը դառնան այն ամուր հիմքը, որի վրա կկառուցվի մեր երազանքների Հայաստանը, և թող յուրաքանչյուր օր մենք շարունակենք քայլել վստահությամբ, ապրել սիրով և ստեղծել ապագա, որի հիմքում կնոջ ուժն ու ներկայությունն են՝ անսահման հույս ու անկոտրում հավատ բերելով մեր հանրությանը»։